‘ಕಾಮದ ಸಹಜ ಕ್ರಿಯೆಯ ಪರಿಣಾಮವನ್ನು ನಿಮ್ಮ ಪತ್ನಿಗೆ ತಿಳಿಸಿ’

-ರಂಗನಾಥ ಕಂಟನಕುಂಟೆ

dusarasvathiಬಚ್ಚೀಸು(ಕತಾ ಸಂಕಲನ)
ಲೇ: ದು. ಸರಸ್ವತಿ
ಮೊದಲ ಮುದ್ರಣ: 2016:
ಬೆಲೆ-80/- ರೂಪಾಯಿಗಳು
ಪ್ರಕಾಶಕರು: ಕವಿ ಪ್ರಕಾಶನ, ಕವಲಕ್ಕಿ, ಹೊನ್ನಾವರ

ದು. ಸರಸ್ವತಿಯವರು ‘ಜೀವಸಂಪಿಗೆ’ ಎಂಬ ಕವನಸಂಕಲನ ಹಾಗೂ ‘ಈಗೇನ್ ಮಾಡೀರಿ?’ ಎಂಬ ಅನುಭವ ಕಥನ ಹಾಗೂ ಇನ್ನೂ ಹಲವು ಕೃತಿಗಳ ಮೂಲಕ ಲೇಖಕಿಯಾಗಿ ಪ್ರಸಿದ್ದರು. ಹಾಗೆಯೇ ಮಹಿಳಾ ಚಳವಳಿಯಲ್ಲಿ ಮತ್ತು ಪೌರಕಾರ್ಮಿಕರ ಚಳವಳಿಯಲ್ಲಿ ಸಕ್ರಿಯವಾಗಿ ಪಾಲ್ಗೊಂಡು ಅವರ ಹಕ್ಕುಗಳಿಗಾಗಿ ಘನತೆಯ ಬದುಕಿಗಾಗಿ ನಿರಂತರವಾಗಿ ಹೋರಾಡುತ್ತ ಸಾಮಾಜಿಕ ಕಾರ್ಯಕರ್ತೆಯಾಗಿಯೂ ಚಿರಪರಿಚಿತರು. ತಮ್ಮ ಬದುಕಿನಲ್ಲಿ ‘ನುಡಿಯೊಳಗಾಗಿ ನಡೆ’ಯುವ ಪ್ರಯತ್ನ ನಡೆಸಿದ್ದಾರೆ. ಅವರೀಗ ‘ಬಚ್ಚೀಸು’ ಎಂಬ ಕತಾಸಂಕಲನವನ್ನು ಹೊರತಂದಿದ್ದಾರೆ. ಇದು ಅವರ ಸಾಮಾಜಿಕ ಹೋರಾಟದ ಅನುಭವರೂಪಿಯಾದ ಕತಾಸಂಕಲನವಾಗಿದೆ.

ಈ ಸಂಕಲನದಲ್ಲಿ ಒಟ್ಟು ಎಂಟು ಕತೆಗಳಿವೆ. ಎಲ್ಲ ಕತೆಗಳ ಕೇಂದ್ರ ಪಾತ್ರಗಳು ಮಹಿಳೆಯರೇ. ಲಕ್ಷೀ, ಸಾವಿತ್ರಿ, ಶಾರದೆ, ಯಲ್ಲಮ್ಮ, ಪಾರ್ವತಿ, ಆಂಜಿನಮ್ಮ ಮುಂತಾದವರು. ಇವರೇ ನಾಯಕಿಯರು. ಈ ಕತಾನಾಯಕಿಯರು ತಮ್ಮ ‘ಗೃಹಬಂಧನ’ವನ್ನು ದಾಟಿ ಸಮಾಜದ ತೊರೆಯಲ್ಲ್ಲಿ ಮೀಯುವಾಗ ಇಲ್ಲಿನ ಕತೆಗಳು ಹುಟ್ಟಿವೆ. ಬೆಂಗಳೂರು ನಗರ ಕತೆಗಳ ನೆಲೆಯಾಗಿದ್ದು ಇಲ್ಲಿಯೇ ನಡೆಯುತ್ತವೆ. ಕೆಲವು ಕತಾನಾಯಕಿಯರು ತುರುವೆಕೆರೆ, ಚಿಕಮಗಳೂರು ಮತ್ತು ಬೆಂಗಳೂರುಗಳ ನಡುವೆ ಪ್ರಯಾಣ ಬೆಳೆಸುತ್ತಾರೆ. ಇವರೆಲ್ಲ ‘ಅಕ್ಷರವೆಂಬ ಊರುಗೋಲ’ನ್ನು ಆತುಕೊಂಡು ಬಿಡುಗಡೆ ಬಯಸಿದ ಹೆಣ್ಣುಗಳು. ಅರಿವಿನ ಹಿಂಸೆಗೆ ತಳ್ಳಲ್ಪಟ್ಟವರು. ಇದರಲ್ಲಿ ಹಲವರು ಸಾಮಾಜಿಕ ಕಾರ್ಯಕರ್ತೆಯರು.

du.ssarasvathiಇಲ್ಲಿನ ಎಲ್ಲ ಕತೆಗಳ ಕ್ರಿಯಾಭೂಮಿ ಬೆಂಗಳೂರೇ. ಅಂದರೆ ನಗರದ ಸಿದಗು ಶಾದರೆಗಳಲ್ಲಿ ಸಿಕ್ಕಿಕೊಂಡಿರುವ ಮಹಿಳೆಯರು ಸಮಾಜವನ್ನು ಎದುರುಗೊಳ್ಳುವ ಬಗೆ ಇಲ್ಲಿನ ಕತೆಗಳಲ್ಲಿ ಸ್ಥಾಯಿಯಾಗಿ ಚಿತ್ರಿತವಾಗಿದೆ. ಇಲ್ಲಿನ ಮುಖ್ಯಕತೆಗಳು ಪೌರಕಾರ್ಮಿಕರ ದಾರುಣ ಬದುಕನ್ನು ಚಿತ್ರಿಸುತ್ತವೆ. ‘ಹೊನ್ನಹೇಲು’, ‘ಬಚ್ಚೀಸು’, ‘ಮಲ್ಲಿಗೆ ತೋಟ’ ಕತೆಗಳು ಸ್ವಚ್ಚತಾ ಕಾರ್ಮಿಕರ ದಿನನಿತ್ಯದ ದುಡಿಮೆಯ ಬದುಕನ್ನು ಮತ್ತು ಅವರನ್ನು ಹೀನಾಯವಾಗಿ ದುಡಿಸಿಕೊಳ್ಳುವ ವ್ಯವಸ್ಥೆಯ ಅಸೂಕ್ಷ್ಮತೆಯನ್ನು ಚಿತ್ರಿಸಿವೆ. ನಗರವನ್ನು ಸ್ವಚ್ಚಗೊಳಿಸುವ ಜನರ ಬದುಕು ಅಸಹನೀಯವಾಗುವಂತೆ ಮಾಡಿರುವ ವ್ಯವಸ್ಥೆಯನ್ನು ಮನಕಲಕುವಂತೆ ಚಿತ್ರಿಸಿವೆ. ‘ಎಚ್ಚರದ ಪ್ರೀತಿಯಲಿ ಬೆಳಕಾಗೋ ಉರಿಗಾಮ’ ಮತ್ತು ‘ಗುರುತಿರದ ವಿಳಾಸ’ ಕತೆಗಳ ನಾಯಕಿಯರು ಸಾಮಾಜಿಕರಣಗೊಳ್ಳುವ ಇಲ್ಲವೆ ಸಾಮಾಜಿಕ ಕಾರ್ಯಕರ್ತೆಯಾಗಿ ಕೆಲಸ ಮಾಡುವಾಗ ಕಂಡುಬರುವ ‘ನಡೆ ಮತ್ತು ನುಡಿಗಳ ನಡುವೆ ಇರುವ ಕಂದರಗಳು’ ಅವುಗಳ ಕತಾವಸ್ತು.

ಈ ಕತೆಗಳ ನಾಯಕಿಯರು ‘ಅಕ್ಷರವೆಂಬ ಊರುಗೋಲು’ ಹಿಡಿದು ನಡೆಯುವಾಗ ಎದುರಿಸಿದ ಭೀಕರ ವಾಸ್ತವಗಳನ್ನು ತೆರೆದಿಡುತ್ತವೆ. ಹಾಗಾಗಿ ಈ ಸಂಕಲನದ ಎಲ್ಲ ಕತೆಗಳ ಕೇಂದ್ರ ನೆಲೆ ಸಮಾಜ ಮತ್ತು ಅದರ ಕ್ರೂರ ವಾಸ್ತವ ನಡೆಗಳು. ಬಿಡುಗಡೆಯ ದಾರಿಯಲ್ಲಿ ಮಹಿಳೆಯರು ಎದುರಿಸುವ ಸವಾಲುಗಳ ಚಿತ್ರವೂ ಇಲ್ಲಿದೆ. ಒಟ್ಟು ದುಡಿಮೆಗಾರರು ಮತ್ತು ಮಹಿಳೆಯರು ಬಗೆಬಗೆಯಲ್ಲಿ ನರಳುವ ಪರಿಯೇ ಎಲ್ಲ ಕತೆಗಳ ವಸ್ತು. ಪೌರಕಾರ್ಮಿಕ ದುಡಿಮೆ ಮತ್ತು ಕರಾಳ ಬದುಕನ್ನು ಚಿತ್ರಿಸುವ ಮೂಲಕ ಕನ್ನಡ ಸಣ್ಣಕತೆಗಳ ಲೋಕಕ್ಕೆ ಹೊಸ ವಸ್ತುವನ್ನು ಸೇರಿಸಿದ್ದಾರೆ. ಹಾಗೆ ಸೇರಿಸಿರುವ ವಸ್ತುಗಳನ್ನು ಹೆಣ್ಣಿನ ಕಣ್ಣೋಟದಿಂದ ನೋಡಲು ಪ್ರಯತ್ನಿಸಲಾಗಿದೆ. ಮತ್ತು ಇಲ್ಲಿನ ಕತೆಗಳು ವೈಯಕ್ತಿಕವಾದ ಅನುಭವಗಳನ್ನು ಹೆಚ್ಚು ಆತುಕೊಳ್ಳುವುದಿಲ್ಲ. ಇಲ್ಲಿ ವೈಯಕ್ತಿಕತೆಯೂ ಸಾಮಾಜಿಕವೇ. ಇಲ್ಲಿ ವ್ಯಕ್ತಿ ಮತ್ತು ಸಮಾಜದ ನಡುವೆ ಹೆಚ್ಚು ಅಂತರವಿಲ್ಲ. ಮತ್ತು ಹೆಣ್ಣುನೋಟದಿಂದ ನೋಡುವಾಗ ಇದುವರೆಗೂ ನಡೆದು ಬಂದಂತೆ ಗಂಡನ್ನು ಕಟಕಟೆಯಲ್ಲಿ ನಿಲ್ಲಿಸುವುದಿಲ್ಲ. ಬದಲಿಗೆ ಆ ನೆಲೆಯನ್ನು ದಾಟಿ, ಹೆಣ್ಣಿನ ವೈಯಕ್ತಿಕ ಸಮಸ್ಯೆಗಳಿಂದಲೂ ಜಿಗಿದು ಸಮಾಜದ ಮುಖ್ಯನೆಲೆಯಲ್ಲಿ ಕತೆಗಳು ಬಿಚ್ಚಿಕೊಳ್ಳುತ್ತವೆ. ಅಂದರೆ ಹೆಣ್ಣಿನ ಸಮಸ್ಯೆಗಳನ್ನು ಮಾತ್ರ ಇಲ್ಲಿ ನಿರೂಪಿಸಿಲ್ಲ. ಬದಲಿಗೆ ಒಟ್ಟು ಸಮಾಜವನ್ನು ಅಲ್ಲಿನ ಕ್ರೌರ್ಯವನ್ನು ಹೆಣ್ಣುನೋಟದ ಮೂಲಕ ನಿರೂಪಿಸಲಾಗಿದೆ. ಆ ಮೂಲಕ ಜೋರುದನಿ ಚೀರಾಟಗಳಿರದೆ ಮೆದುಮಾತಿನಲ್ಲಿಯೇ ತಣ್ಣಗೆ ಸಾಮಾಜಿಕ ಸಂಘರ್ಷವನ್ನು ನಡೆಸಲಾಗಿದೆ.

ಈ ಎಲ್ಲ ಸಂಗತಿಗಳನ್ನು ಗಮನಿಸಿದರೆ ಲೇಖಕಿ ದು. ಸರಸ್ವತಿಯವರು ತಮ್ಮ ಹೋರಾಟದ ಜೀವನದಲ್ಲಿ ಕಂಡುಕೊಂಡ ಸಾಮಾಜಿಕ ವಾಸ್ತವವನ್ನು ಕತೆಗಳ ಮೂಲಕ ದಾಖಲಿಸಿದ್ದಾರೆ ಎನ್ನಬಹುದು. ಹಾಗಾಗಿ ಅವರ ಆತ್ಮಕಥಾನಕದಂತೆಯೂ ಇಲ್ಲಿನ ಕತೆಗಳಿವೆ. ಕತೆಗಾರರ ವೈಯಕ್ತಿಕ ಜೀವನ ಮತ್ತು ಸಾಮಾಜಿಕ ಕಾರ್ಯಕರ್ತರ ಸಾರ್ವಜನಿಕ ಬದುಕುಗಳೆರಡೂ ಒಂದಾದಾಗ ಹುಟ್ಟಿಕೊಳ್ಳುವ ಬರೆಹಗಳಂತೆಯೂ ಇಲ್ಲಿನ ಕತೆಗಳಿವೆ. ಅಂಬೇಡ್ಕರ್ ಹಚ್ಚಿದ ಹೋರಾಟದ ಹಣತೆಯನ್ನು ಮಹಿಳೆಯರು ಕಾಪಿಡುವಂತೆಯೂ ಇಲ್ಲಿನ ಕತೆಗಳಿವೆ.

ಮುಖ್ಯವಾಗಿ ಇಲ್ಲಿ ಒಂದು ಸಂಗತಿಯನ್ನು ಚರ್ಚಿಸಬೇಕು. ಅದೆಂದರೆ ಇಂದಿನ ಕಾಲದಲ್ಲಿ ಹೆಣ್ಣಿನ ಮೇಲೆ ನಿತ್ಯ ನಡೆಯುವ ಲೈಂಗಿಕ ಮತ್ತು ಇತರೆ ಬಗೆಯ ದೌರ್ಜನ್ಯಗಳನ್ನು ತಡೆಯಲು ರೂಪಿಸಿರುವ ಎಲ್ಲ ಬಗೆಯ ಕಾನೂನುಗಳು ಪುರುಷ ಕೇಂದ್ರಿತವಾದವು. ಅಂದರೆ ದೌರ್ಜನ್ಯಗಳನ್ನು ತಡೆಯಲು ಕಾನೂನು ರೂಪಿಸುವ ಕೆಲಸದಲ್ಲಿ ತೊಡಗಿರುವುದು ಬಹುತೇಕ ಪುರುಷರೇ. ಅವರ ಕಣ್ಣಳತೆಗೆ ತಕ್ಕಂತೆ ಕಾನೂನುಗಳನ್ನು ರೂಪಿಸಲಾಗುತ್ತದೆ. ಹೆಣ್ಣಿನ ಮೇಲೆ ದೌರ್ಜನ್ಯ ನಡೆಸುವವರು ಪುರುಷರೇ. ಅವುಗಳನ್ನು ನಿಯಂತ್ರಿಸುವ ಕಾನೂನುಗಳನ್ನು ರೂಪಿಸುವವರು ಪುರುಷರೇ. ಇಂತಹ ಸಂದರ್ಭದಲ್ಲಿ ದೌರ್ಜನ್ಯವು ಹಿಂಸೆಯನ್ನು ಹುಟ್ಟಿಸಿದಂತೆ ಅದನ್ನು ನಿಯಂತ್ರಿಸುವ ಕಾನೂನುಗಳು ಕೂಡ ಹಿಂಸೆಯನ್ನು ವ್ಯವಸ್ಥಿತವಾಗಿ ಉತ್ಪಾದಿಸುತ್ತವೆ. ಅಲ್ಲದೆ ಒಳ್ಳೆಯ ಕಾನೂನುಗಳು ಇದ್ದರು ಅವುಗಳನ್ನು ಜಾರಿಗೊಳಿಸುವ ಪ್ರಕ್ರಿಯೆಯಲ್ಲಿ ಲಿಂಗಸಂವೇದನೆಯ ಸೂಕ್ಷ್ಮತೆ ನ್ಯಾಯ ಪರಿಪಾಲಕರಿಗೆ ಇಲ್ಲದ ಕಾರಣಕ್ಕಾಗಿ ನ್ಯಾಯವನ್ನು ಪಡೆಯುವುದು ಈ ವ್ಯವಸ್ಥೆಯಲ್ಲಿ ಸಾಧ್ಯವಾಗುವುದೇ ಇಲ್ಲ. ಇನ್ನು ಕೆಲವು ವೇಳೆ ಕಾನೂನುಗಳೇ ನ್ಯಾಯವನ್ನು ತಡೆಯುತ್ತವೆ. ನೆಪಮಾತ್ರದ ಕಾನೂನುಗಳಾಗಿ ಉಳಿದು ಬಿಡುತ್ತವೆ.
ಬಹುಶಃ ಈ ದೌರ್ಜನ್ಯಗಳನ್ನು ನಿಯಂತ್ರಿಸುವ ಅಧಿಕಾರವು ಮಹಿಳೆಯರಿಗೆ ಇದ್ದು ಅವರೇ ಕಾನೂನು ರೂಪಿಸಿದರೆ ಅವುಗಳ ಸ್ವರೂಪ ಬೇರೆಯದೇ ಇರಬಹುದು.

ಅಲ್ಲದೆ ತನ್ನ ಮೇಲೆ ನಡೆಯುವ ದೌರ್ಜನ್ಯದ ವಿಚಾರದಲ್ಲಿ ಹೆಣ್ಣು ತೆಗೆದುಕೊಳ್ಳುವ ತೀರ್ಮಾನವೂ ಭಿನ್ನವಾಗಿರಬಹುದು. ಹೀಗೆ ಹೇಳಲು ಅನೇಕ ಎತ್ತುಗೆಗಳನ್ನು ನೀಡಬಹುದು. ಅಂತಹ ಒಂದು ಉದಾಹರಣೆಯನ್ನು ಈ ಸಂಕಲನದಿಂದಲೇ ನೀಡಬಹುದು. ‘ಎಚ್ಚರದ ಪ್ರೀತಿಯಲಿ ಬೆಳಕಾಗೋ ಉರಿಗಾಮ’ ಕತೆಯ ನಾಯಕಿ ಪಾರ್ವತಿ. ಬಹಳ ಶ್ರಮವಹಿಸಿ ದುಡಿದು ವಿದ್ಯಾಭ್ಯಾಸ ಪಡೆಯುತ್ತಲೇ ಉನ್ನತ ಶಿಕ್ಷಣಕ್ಕಾಗಿ ಬೆಂಗಳೂರು ವಿಶ್ವವಿದ್ಯಾಲಯಕ್ಕೆ ಬಂದಿರುತ್ತಾಳೆ. ಗೆಳೆಯರ ಸಂಪರ್ಕದಿಂದಾಗಿ ಸ್ವಯಂಸೇವಾ ಸಂಸ್ಥೆಯ ಪರಿಚಯವಾಗಿ ಅಲ್ಲಿನ ಚಟುವಟಿಕೆಗಳಲ್ಲಿ ಪಾಲ್ಗೊಳ್ಳುತ್ತಿರುತ್ತಾಳೆ. ಅಲ್ಲಿಗೆ ರಾಜಕೀಯ ಪಾಠಗಳನ್ನು ತೆಗೆದುಕೊಳ್ಳಲು ಬರುತ್ತಿದ್ದ ರಾಜನ್ ಎಂಬುವರ ಆಕರ್ಷಕ ಮಾತುಗಳಿಗೆ ಮನಸೋತು ಬಸಿರಾಗುತ್ತಾಳೆ. ಈ ವಿಷಯವನ್ನು ಆತನಿಗೆ ತಿಳಿಸಿದಾಗ ಆತ ‘ಇದೆಲ್ಲ ಕಾಮ ಸಹಜ ಕ್ರಿಯೆ’ ಎಂದು ಹೇಳುತ್ತ, ಐದು ಸಾವಿರ ಹಣ ನೀಡಿ ಗರ್ಭಪಾತ ಮಾಡಿಸಿಕೊಳ್ಳುವಂತೆ ಹೇಳುತ್ತಾನೆ. ಬೇಸತ್ತು ಅಲ್ಲಿಂದ ಹೊರಟ ಪಾರ್ವತಿ ತಮಟೆಯ ಬಡಿತಕ್ಕೆ ಕುಣಿದಾಗ ಗರ್ಭಪಾತವಾಗಿ ಬಸಿರು ಕಳೆಯುತ್ತದೆ. ಅವಳು ಮರಳಿ ಬಂದು ಐದು ಸಾವಿರ ರೂಪಾಯಿಯನ್ನು ವಾಪಸ್ಸು ಕೊಟ್ಟು ‘ನಮ್ಮ ನಡುವಿನ ಕಾಮದ ಆಕರ್ಷಣೆಯ ಸಹಜ ಪರಿಣಾಮವನ್ನು ನೀವು ಪ್ರೀತಿಸಿ ಮದುವೆಯಾದ ಹೆಂಡತಿಗೆ ತಿಳಿಸಿ’ ಎಂದು ದಿಟ್ಟವಾಗಿ ನುಡಿದು ಅಲ್ಲಿಂದ ಹೊರಡುತ್ತಾಳೆ.

ಇದು ಸಾಮಾನ್ಯವಾಗಿ ನೋಡುವ ಕ್ರಮಕ್ಕಿಂತ ಇಲ್ಲಿನ ತೀರ್ಮಾನ ಭಿನ್ನವಾಗಿದೆ. ಆತನ ಮೇಲೆ ಸೇಡಿನ ನುಡಿಗಳನ್ನಾಡದೆ ಆತನನ್ನು ದಿಟ್ಟಿಸಿ ಹೇಳುವ ಆ ಮಾತು ಕಾಡಿಸುತ್ತದೆ. ಇದು ಮಹಾಶ್ವೇತಾ ದೇವಿ ಅವರ ಕತೆಯ ನಾಯಕಿ ‘ದೋಪ್ದಿ’ ನೆನಪಾಗುತ್ತಾಳೆ. ‘ದಿ ಸೇಲ್ಸ್‍ಮನ್’ ಎಂಬ ಸಿನಿಮಾದಲ್ಲಿ ಅದರ ನಾಯಕಿಯ ಮೇಲೆ ವಯೋವೃದ್ಧನಾದ ವ್ಯಕ್ತಿ ಲೈಂಗಿಕ ದೌರ್ಜನ್ಯ ನಡೆಸಲು ಯತ್ನಿಸುತ್ತಾನೆ. ತಪ್ಪಿಸಿಕೊಂಡಿದ್ದ ಆತ ಸಿಕ್ಕಿಕೊಂಡ ನಂತರ ಆಕೆಯ ಗಂಡ ಆತನ ವಿರುದ್ಧ ಸೇಡು ತೀರಿಸಿಕೊಳ್ಳಲು ಬಯಸಿದರೆ, ಆಕೆ ಆತನನ್ನು ಶಿಕ್ಷಿಸಿದರೆ ‘ನನ್ನ ನಿನ್ನ ಸಂಬಂಧ ಇಂದಿಗೆ ಕೊನೆÀÉಯಾಗುವುದೆಂದು’ ಗಂಡನಿಗೆ ಹೇಳುತ್ತಾಳೆ. ಇದು ನೋಡುಗರಲ್ಲಿ ಅಚ್ಚರಿ ಹುಟ್ಟಿಸಿ ಹಲವು ಪ್ರಶ್ನೆಗಳನ್ನು ಎತ್ತುವಂತೆ ಮಾಡುತ್ತದೆ. ಹಾಗೆಯೇ ಮಣಿಪುರದ ಮಹಿಳೆಯರು ತಮ್ಮ ಬೆತ್ತಲೆಯ ದೇಹವನ್ನು ಸೇನೆಯ ವಿರುದ್ಧ ಪ್ರತಿಭಟನೆಯ ಅಸ್ತ್ರವನ್ನಾಗಿ ಬಳಸಿ ಎದುರು ನಿಂತದ್ದು ಇದೆ. ಇವೆಲ್ಲ ಪ್ರಸಂಗಗಳು ಪುರುಷ ಯೋಚಿಸುವುದಕ್ಕಿಂತ ಭಿನ್ನವಾಗಿ ಹೆಣ್ಣು ಯೋಚಿಸುವುದು ತಿಳಿಯುತ್ತದೆ. ಅಲ್ಲದೆ ಇವೆಲ್ಲ ಪುರುಷರೂಪಿತ ಕಾನೂನಿಗಿಂತ ಹೆಚ್ಚು ಬಲಶಾಲಿಯಾಗಿರುವುದು ಕಂಡುಬರುತ್ತದೆ. ಗಂಡು ನಡೆಸುವ ದೌರ್ಜನ್ಯಗಳಿಗೆ ಹೆಣ್ಣು ತೋರುವ ಈ ಪ್ರತಿಕ್ರಿಯೆಗಳು ಕಾನೂನಿಗೂ ಮಿಗಿಲಾದ ಮಾನವೀಯ ಪಾಠಗಳನ್ನು ಹೇಳುತ್ತಿವೆ. ಈ ದಿಸೆಯಲ್ಲಿ ಯೋಚಿಸಿದರೆ ಲೈಂಗಿಕ ದೌರ್ಜನ್ಯಗಳಿಗೆ ಬೇರೊಂದು ಬಗೆಯ ಸಾಮಾಜಿಕ ಪರಿಹಾರದ ಕಡೆಗೆ ಯೋಚಿಸಬೇಕಿರುವುದು ಗಮನಕ್ಕೆ ಬರುತ್ತದೆ. ಹೆಣ್ಣು ತನ್ನ ಮೇಲಿನ ದೌರ್ಜನ್ಯವನ್ನೇ ಪ್ರತಿಭಟನೆಯಾಗಿ, ಹಿಂಸೆಯೇ ಇಲ್ಲದೆ ದೌರ್ಜನ್ಯ ಎದುರಿಸುವ ಬಗೆ ಪುರುಷ ಕೇಂದ್ರಿತ ಕಾನೂನು ಮತ್ತು ಪರಿಹಾರಗಳ ಬಗೆಗೆ ಮರುಯೋಚಿಸುವಂತೆ ಮಾಡುತ್ತವೆ.

ಅಂದರೆ ಇಂದಿನ ಸಮಾಜದ ಹಿಂಸೆ ದೌರ್ಜನ್ಯಗಳಿಗೆ ಹೆಣ್ಣುನೋಟದ ಪರ್ಯಾಯ ಚಿಂತನೆಗಳೇ ಬೇರೆ ಇರಲು ಸಾಧ್ಯವಿದೆ ಎಂಬುದನ್ನು ಇಂತಹ ಕತೆಗಳು ತೋರಿಸಿಕೊಡುತ್ತವೆ. ಕನ್ನಡ ಚಿಂತನೆ ಇಲ್ಲವೇ ಯಾವುದೇ ಸಮಾನತೆಯ ಚಿಂತನೆ ಮತ್ತು ಚರಿತ್ರೆಯನ್ನು ಕಟ್ಟುವವರಿಗೆ ತಮ್ಮನ್ನು ತಾವು ಅರಿತುಕೊಳ್ಳಲು ಇಂತಹ ಕತೆಗಳು ನೆರವಾಗುತ್ತವೆ. ಅಲ್ಲದೆ ಹೆಣ್ಣು ಕಟ್ಟುವ ಹೆಣ್ಣಿನ ಚರಿತ್ರೆ, ಸಮಾಜದ ಚರಿತ್ರೆಗಳು ಹೇಗಿರುತ್ತವೆ ಎಂಬುದನ್ನು ಇಲ್ಲಿ ಗಮನಿಸಬಹುದಾಗಿದೆ. ಅದಕ್ಕೆ ತಕ್ಕ ಮೇವನ್ನು ಇಲ್ಲಿನ ಕತೆಗಳು ಒದಗಿಸುತ್ತವೆ.

ಹಾಗಾಗಿ ಎಚ್ಚರಗೊಂಡ ಹೆಣ್ಣಿನ ಕಣ್ಣಿಗೆ ಕಾಣುವ ಬಾಹ್ಯ ಜಗತ್ತಿನ ಹಿಂಸೆ ಮತ್ತು ದೌರ್ಜನ್ಯಗಳಿಗೆ ಬೇರೆಯದೇ ಆದ ಪರಿಹಾರವಿದೆ ಎಂಬುದನ್ನು ಸೂಚಿಸುತ್ತವೆ. ಈ ಹಿನ್ನೆಲೆಯಿಂದ ನೋಡಿದಾಗ ಬಚ್ಚೀಸು ಕತಾಸಂಕಲನವು ಮಹತ್ವದ್ದಾಗಿ ಕಂಡುಬರುತ್ತದೆ. ಇಲ್ಲಿನ ಕತೆಗಳ ಭಾಷೆಯು ಆಡುನುಡಿ ಮತ್ತು ಬರೆಹಗಳ ಭಾಷೆ ಕೂಡಿ ಕತೆಗಳ ಭಾಷೆಯು ರೂಪುಗೊಂಡಿದೆ. ಆದರೆ ಇಲ್ಲಿನ ಎಲ್ಲ ಕತೆಗಳು ‘ಕಣ್ಣಳತೆಗೆ ಸಿಕ್ಕ ಕತೆಗಳೇ ಆಗಿದ್ದು ಕರುಳರಿಯುವಲ್ಲಿ ಕೊಂಚ ತೆಳುವಾದಂತೆ’ ಕಾಣಿಸುತ್ತವೆ. ಇದು ಕೆಲವೆಡೆ ಕತೆಗಳನ್ನು ಸರಳವಾದ ಗೆರೆಗಳಲ್ಲಿಯೇ ನಿರೂಪಿಸಿದಂತೆಯೂ ಕಾಣಿಸುತ್ತದೆ. ಕೆಲವೆಡೆ ಸಾಮಾಜಿಕ ಕಾರ್ಯಕರ್ತರಿಗಿರುವ ವೈಚಾರಿಕ ಸ್ಪಷ್ಟತೆಗಳು ಕತೆಗಳ ಒಳಗೆ ಪ್ರವೇಶಿಸುವುದರಿಂದ ಅದು ಸಂಕೀರ್ಣತೆಯನ್ನು ಸರಳಗೊಳಿಸಿರುವಂತೆಯೂ ಎನ್ನಿಸುತ್ತದೆ. ಇದರ ಹೊರತಾಗಿ ಕತೆಗಳು ಓದುಗರಿಗೆ ಇಷ್ಟವಾಗುವ ಎಲ್ಲ ಸಾಧ್ಯತೆಗಳೂ ಇವೆ.

 

5 Responses to "‘ಕಾಮದ ಸಹಜ ಕ್ರಿಯೆಯ ಪರಿಣಾಮವನ್ನು ನಿಮ್ಮ ಪತ್ನಿಗೆ ತಿಳಿಸಿ’"

  1. Ravu  February 27, 2017 at 8:44 am

    ರಂಗನಾಥ ಗುರುಗಳೆ, ನಿಮ್ಮ ಕವಿತೆ ಓದಿ ದನ್ಯೋಷ್ಮೀಯಾದೆ, ನಾನು ನಿಮಗೆ ಚಿರ ಋಣಿ.

    Reply
  2. ramesh  February 27, 2017 at 11:58 am

    ಕವಿತೆ ಚೆನ್ನಾಗಿದೆ ಅರ್ಥಪೂರ್ಣವಾಗಿದೆ ದನ್ಶವಾದಗಳು

    Reply
  3. ಪಿ. ಮಂಜುನಾಥ  February 27, 2017 at 4:46 pm

    ಒಳ್ಳೆಯ ವಿಮರ್ಶೆ..

    Reply
  4. Mallikarjun Choukashi  February 28, 2017 at 4:04 am

    ನನಗೆ ಈ ಪುಸ್ತಕ ಬೇಕಿತ್ತು. ವಿಳಾಸ ನೀಡಿದ್ದಿರಿ ಸಂತೋಷ. ಅದರೊಂದಿಗೆ ದೂರವಾಣಿ ಸಂಖ್ಯೆ ನೀಡಿದರೆ ಒಳ್ಳೆಯದಾಗತಿತ್ತು

    Reply
    • admin  February 28, 2017 at 2:32 pm

      h.s. anupama-publisher-mo.no9480211320

      Reply

Leave a Reply

Your email address will not be published.